5. කාම සැප විඳීමේ ආදීනව.

(1) (වරං භික්‌ඛවෙ, තත්‌තාය අයොසලාකාය ආදිත්‌තාය සම්‌ප ජ්‌ජලිතාය සජොති භූතාය චක්‌ඛුන්‌ද්‍රියං සම්‌පලිමට්‌ඨං, නත්‌වෙව චක්‌ඛු විඤ්‌ඤෙය්‍යෙසු රූපෙසු අනුබ්‍යඤ්‌ජනසො නිමිත්‌තග්‌ගා හො. නිමිත්‌තස්‌සාද ගථිතංවා භික්‌ඛවෙ, විඤ්‌ඤාණං තිට්‌ඨමනං තිට්‌ඨෙය්‍ය, අනුබ්‍යඤ්‌ජනස්‌සාදගථිතංවා තස්‌මිඤ්‌චෙ සමයෙ කාලං කරෙය්‍ය, ඨානමෙතං විජ්‌ජති, යං ද්‌වින්‌නං ගතීනං අඤ් ඤතරං ගතිං ගච්‌ඡෙය්‍ය, නිරයංවා, තිරච්‌ඡානයොනිංවා. ඉමං ඛ්‌වාහං භික්‌ඛවෙ, ආදීනවං දිස්‌වා එවං වදාමි)

^{-සං.නි.සළායතනවග්ග.ආදිත්තපරියායසුත්තං-}

ඇසින් දුටු ලස්සන දේවල් මතක් කර ආස්වාදය ලබනවාට වඩා, ගිනියම්වූ යකඩ තහඩුවක් ඇස් වල අතුල්ලා ගැනීම සුදුසුය. ආස්වාද ජනක සිතක් පවතින මොහොතක, මරණයට පත් වුනොත්, ඒ සිතෙන් ඊළඟට උපදින්නේ නිරයේ හෝ තිරිසන් ලෝකයේය. ගිනියම්වූ යකඩයක් ඇස් වල අතුල්ලා ගැනීමෙන්, අපාගත වන්නේ නැත. ඇස්-කන්-නාස-දිව-කය-මනස යන ඉන්ද්‍රිය වලින් කාම සැප ආස්වාදය ලබන ලෝභ චේතනා වලට නියමිත විපාකය නිරයේ හෝ තිරිසන් භවයේ ඉපදීමයි. කාම පිපාසයෙන් පෙළෙන ස්වභාවය යටතේ පවතින නිරයේ හා තිරිසන් අපායේ ඉපදීමට, එම කාම පිපාසය සහිත චේතනාවල් හේතුවේ. තවදුරටත් කාම සැපයේ ආදීනව මෙසේය,

ලෝකයේ ඉපදෙන මිනිසා කුඩා කාලයේ සිට ඉගෙන ගෙන රැකියා කිරීම සඳහා අප්‍රමාණ කරදර විඳ දරාගෙන, නොකා-නොබී වෙහෙස මහන්සිවී, මැරීගෙන උත්සාහ කළයුතුය. එය අසාර්ථක වුණොත් අසහනයට පත්වී දුක් විඳින්නට සිදුවේ. සාර්ථක වුනත්, උපයා ගන්නා දේපල ධනය රැකගෙන දියුණු කිරීම සඳහා මැරෙන තුරු දිගටම නානප්‍රකාර දුක් කරදර ප්‍රශ්ණ වලට ප්‍රායෝගිකව මුහුණ දීමට සිදුවේ.

එසේම, කාමසැප විඳීම හේතුවෙන් රටවල් වල පාලකයන් ගේ සිට, සමාජයේ අනෙකුත් සියලුම තරාතිරම් වල පුද්ගලයන් එකිනෙකා වාද විවාද කරති. මවුපියන්, දරුවන්, සහෝදර සහෝදරියන්, මිතුරන් එකිනෙකා වාදවිවාද කරති. වාදවිවාද කෝළහල කරගෙන, අතින්-පයින්, ගල් වලින්, පොලු වලින්, ආවුධවලින් පහරදී ඇනකොටාගෙන මරාගෙන යුද්ධ කරති. සියදිවි හානි කර ගැනීම් ආදී නොයෙක් අපරාධ කරති.

තවද කාමසැප විඳීම හේතුවෙන් සොරකම්, පැහැර ගැනීම්, පරදාර සේවනය, මත් ද්‍රව්‍ය භාවිතය, දූෂණ, භීෂණ, ඝාතන, ත්‍රස්තවාදය ආදී විවිධ පාප කර්ම සිදුවන අතර, ඒවාට දඬුවම් වශයෙන් සිරගත කිරීම, අත්පා කැපීම, ඝාතනය කිරීම ආදී වධ බන්ධන සිදුවේ. මේ සියල්ල කාම සැප විඳීමට යාමේ තාත්වික ප්‍රායෝගික ආදීනව හා දුක් කරදරවේ.

කාමසැප විඳීම හේතුවෙන් කරන- කියන- හිතන පාපකර්ම වල විපාක වශයෙන්, මරණින් පසුව නිරය-තිරිසන්-ප්‍රේත ආදී අපායවල් වල ඉපදීම, කාම සැප විඳීමට යාමේ පරලොව ආදීනව හා දුක් කරදරවේ.

(2) කාම සැපය, මස් නැති ඇට කෑල්ලක් ලෙව කෑම හා සමානය. මස් නැති ඇට කෑල්ලක් ලෙව කෑමට කොතරම් වෙහෙස වුනත්, එයින් බඩගින්න නිවෙන්නේ නැත. කාමසැප විඳීමට වෙහෙස වීමෙන්ද, කවදාවත් සෑහීමක් වෙන්නේ නැත.

කාමසැපය, සතෙකුට අසුවුන මස් කෑල්ලක් හා සමානය. මස් කෑල්ලක් ලැබුණ සතෙකුට එය නිදහසේ කෑමට ඉඩ නොලැබේ. වටේ ඉන්න සතුන් ඌව මරාගෙන හෝ මස් කෑල්ල උදුරා ගැනීමට තැත් කරයි. කාමසැපය විඳීමත් එවැනි අත්දැකීමකි. කාම සැප විඳින අයව මරාගෙන හෝ අනුන්ගේ සැප උදුරා ගැනීමට බලා සිටින බොහෝ දෙනා ලෝකයේ ඇත.

කාම සැපය, ගිනි අඟුරු ගොඩකට සමානය. ගිනි අඟුරු ගොඩක් ළඟ ඉන්න කෙනෙක්, තමන්ගේ ඇඟ හැකි තරම් ඒ ගිනි අඟුරු ගොඩෙන් ඈත් කරගන්නේ, ගිනි අඟුරු වලට පිච්චෙන බව දන්නා නිසාය. කාම සැප විඳීමත් සිතට හා කයට ප්‍රායෝගිකව දැනෙන දැවිල්ලකි. කාම සැපයෙන් ආස්වාදය ලබන චේතනාවට නියමිත විපාක ලෙස නිරයේ හා තිරිසන් අපාය වල ඉපදීමත් අනිවාර්යවේ. ඒ නිසා කාම සැප විඳීමේ එම අදීනව දන්න පුද්ගලයා, කාම සැපය ගිනි අඟුරු ගොඩක් මෙන් සළකා, කාම සැපයෙන් ඈත්වේ.

කාමසැපය, සිහිනයක් දැකීම හා සමානය. සිහිනෙන් දකින ලස්සන දේවල්, අවදිවී බලන විට නැත. කාම-සැපය කොච්චර වින්ඳත්, ඒ වින්දනය ඒ වෙලාවේම ක්ෂණිකව ඉවර වෙන්නේ, සිහිනෙන් දුටු දෙයක් මෙන්ය. අන්තිමට ඉතුරු වෙන්නේ දැවිල්ල, පිපාසය, අසහනය, තණ්හාව හා අපාගත වෙන අවස්ථාව යන දුක් කරදර විතරය.

කාමසැපය, කුෂ්ඨ රෝගයක් හා සමානය. කුෂ්ඨ රෝගියා, ගිනි කබලක් ලඟට අරගෙන කුණුහම රත් කරමින් නියපොතු වලින් කැසීම නිසා තුවාල පෑරීමෙන් කුෂ්ඨය තවත් උත්සන්න වෙන අතර, කැසීමෙන් යම්කිසි ආස්වාදයක් ලැබේ. රෝග තත්වය හේතුවෙන් ඉන්ද්‍රිය විකලවීම නිසා, ගිනි රස්නයෙන් එන දැවිල්ල හා තුවාල පෑරීමෙන් එන වේදනාව සැපක් මෙන් විපරීතව ඔහුට දැනුනත්, ප්‍රායෝගිකව එය තනිකරම දුකක්ය.

පිපාසයෙන් පෙළෙන විට කාමරාගයෙන් රත්වී, කාමයෙන් දැවෙමින් කාමසැපය විඳීම නිසා, කාම-තණ්හාව, කාම-පිපාසය හා කාම-දැවිල්ල තවත් වැඩි වෙන අතර, කාම සේවනයෙන් සුලු ආස්වාදයක්ද ලැබේ. කාම-තණ්හාව, කාම-පිපාසය හා කාම- දැවිල්ල හේතුවෙන් ඉන්ද්‍රිය විකලවීම නිසා කාම සේවනය සැපක් මෙන් දැනුනත්, කාම සේවනය තනිකරම දුකක්ය.

(3) කාම සැපය තේරුම් ගත යුත්තේ ත්‍රස්තවාදයක්, භීෂණයක්, දුකක්, රෝගයක්, ලෙඩක්, තුවාලයක්, වහක්, වනයක්, ඇණයක් ගැටයක්, රැවටීමක්, වංචාවක්, අවුලක්, මුළාවක්, මායාවක් ආදී වශයෙන්ය. කාම රාගයෙන් වල්මත්වී, අවශ්‍යතා පිනවන විට, මෙලොව හා පරලොව ඇති වන ත්‍රස්තවාදය- භීෂණය- දුක- ලෙඩ- රෝග- තුවාල- වසකෑම- වනවීම්- ඇණගැනීම්- ගැට- රැවටිලි- වංචා- අවුල්- මුළාවීම්- මායාවල් ආදියෙන් කිසිම ගැලවීමක් නැති නිසා, කාම සැපය එසේ නිර්වචනය කරනු ලැබේ. කාම සැප විඳීමේ ආදීනව-දුක-මහන්සිය හා දෝෂ ඉතා බරපතලය, සුලු ආස්වාදයකි. ඒ නිසා, වතුර පිපාසයෙන් පෙළෙන කෙනෙකුට, ප්‍රියමනාප, වර්ණවත්, සුවඳවත්, රසවත්, වසමිශ්‍ර පානයක් ලැබීම මෙන් කාම සැපය තේරුම්ගත යුතුය.

කාම සැපය නිසා සිතේ ඇති වෙන උවමනාව-රාගය-ද්වේශය-මුළාව-ගැටීම් යනාදිය වහාම නිවාරණය කළයුතුය. ඒ හැඟීම් වලින්, දුෂණ- භීෂණ- අනතුරු- ආරවුල්- හිරිහැර- කරදර ආදී අසත්පුරුෂකම් සිදුවේ. කාම සැපය, භාවිතා නොකළ යුතු, බහුලව නොකළ යුතු, භයානක සැපයකි. එදිනෙදා ජීවිතයේදී ඇහැට ලස්සන දේවල් දැකීම, කණට මිහිරි දේවල් ඇසීම, දිවට රස දේවල් කෑම-බීම, නහයට සුවඳ දේවල් ඉඹීම, ඇඟට සිනිදු දේවල් අතගෑම හා සිතින් ආස කරන දේවල් මතක් කිරීම, යනාදී භෞතික දේවල් වලින් ආස්වාදයක් ලබන සෑම මොහොතකම, ඇති වන රාග සිතිවිලි ගණනට අපාගත වීමේ අවස්ථාව ලැබෙන වෙන බව හොඳින් තේරුම්ගත යුතුය. ඒ නිසා මරණයට පත්වෙන කෙනෙක් සුගතියකට යාමට තිබෙන අවස්ථාව පොළවෙන් නිය පිටට ගන්න පස් ටිකක් තරම් ඉතා සුළුය. අපාගත වීමේ අවස්ථාව මහ පොළවේ පස් මෙන් ඉතා වැඩිය. කාම සැප විඳීම තනිකරම අපාගත වෙන අකුසලයක් නිසා, ලෝකයේ දුක් කරදර මවන කාම සැප අත්නොහැර දුක නිවීමක් නොවෙන බව දැනගෙන, අදීනව බලාගෙන, කාම සැපයෙන් නිදහස් වෙන ප්‍රඥාව ඇතුව, ගින්නට පනින පළඟැටියන් මෙන් හිතාගෙන කාම සැප විඳීම කළ යුතුය.

(න කහාපණවස්‌සෙන, තිත්‌ති කාමෙසු විජ්‌ජති

අප්‌පස්‌සාදා දුක්ඛා කාමා, ඉති විඤ්‌ඤාය පණ්‌ඩිතො

අපි දිබ්‌බෙසු කාමෙසු, රතිං සො නාධිගච්‌ඡති

තණ්‌හක්‌ඛයරතො හොති, සම්‌මාසම්‌බුද්‌ධසාවකො) _{-ධ.ප.බුද්ධවග්‌ග-}

රත්තරන් වැස්සකින්වත් සෑහීමක් නැති කාමයේ සුලු ආස්වාදය නිසා බොහෝ දුක් විඳින බව දැනගෙන, දිව්‍ය-කාම සැපයවත් නොපතන බුද්ධ සාවකයා, තණ්හාව ඉවර කිරීමට ආසාකරයි.

(දු‌ගති ගමනං මග්‌ගං, මනුස්‌සා කාම හෙතුකං

බහුං වෙ පටිපජ්‌ජන්‌ති, අත්‌තනො රොගමාවහං.

එවං අමිත්‌ත ජනනා, තාපනා සංකිලෙසිකා

ලොකාමිසා බන්‌ධනීයා, කාමා මරණ බන්‌ධනා

කාම පඞ්‌කෙන සත්‌තා හි, බහූ ලොකෙ අවිද්‌දසූ

පරියන්‌තං න ජානන්‌ති, ජාතියා මරණස්‌සච.) 
_{-සුභාකම්‌මාරධීතුථෙරීගාථා-}

අපායට හා ලෙඩරෝග වලට මග පාදන, සතුරු කරදර හා පසුතැවිලි ඇති කරන, මරණයට බඳවා තබන, කාමය නැමති මඩ වලේ එරෙන අවිද්‍යාගත මිනිසාගේ උපදින-මැරෙන සංසාරය කෙළවරක් නොපෙනේ.

(යඤ්‌ච කාම සුඛං ලොකෙ, යඤ්‌චිදං දිවියං සුඛං,

තණ්‌හක්‌ඛය සුඛස්‌සෙතෙ කලං නාග්‌ඝන්‌ති සොළසිං)

^{-උදානපාලි.රාජසුත්‌තං-}

මනුස්ස කාම සැප හා දිව්‍ය ලෝකවල සියලුම සැපය, තණ්හාව ඉවර කිරීමේ සැපයෙන් අංශු මාත්‍රයක් තරම්වත් වටින්නේ නැත.

(සුඛා විරාගතා ලොකෙ, කාමානං සමතික්‌කමො)

ලෝකයේ කාමය ඉක්මවා විරාගී බවට පත්වීම 

සැපයකි.෴